शालेय क्रीडा स्पर्धा आयोजन बाबत शाळा/ महाविदयालयांना मार्गदर्श सुचना

 

महाराष्ट्र शासनाच्या क्रीडा विभागामार्फत दरवर्षी शालेय क्रीडा स्पर्धांचे आयोजन करण्यात येते. तथापि, सन 2020-2021 आणि 2021-2022 या दोन वर्षामध्ये कोविड 19 प्रादुर्भावामुळे शालेय क्रीडा स्पर्धेचे आयोजन करण्यात आलेले नव्हते.

      सन 2022-2023 या वर्षीच्या शालेय क्रीडा स्पर्धा आयोजनास शासनाने नुकतीच परवानगी दिलेली आहे. यावर्षी सन 2019-20प्रमाणेच स्पर्धा आयोजनाच्या प्रवेशिका हया ऑनलाईन पधद्तीनेच घेण्यात येणार आहेत. याबाबत www.mumbaidivsports.com ही ऑनलाईन प्रवेशिका भरण्याबाबतची साईट सुरु करण्याबाबत कार्यवाही सुरु आहे. सदर साईट सुरु होताच याबाबत शाळा महाविदयालयांना अवगत करण्यात येईल. तसेच तालुकास्तरावर बैठकांचे आयेाजन करुन आपणास पुढील माहिती देण्यात येईल. तत्पुर्वी शाळा महाविदयालयांनी पुढील मार्गदर्शक सुचनांप्रमाणे कार्यवाही करावी. जेणेकरुन स्पर्धा आयोजन करताना अडचणी येणार नाहीत.

1)       शाळा महाविदयालयांनी आपल्यास्तरावर विविध खेळांच्या खेळाडूंची निवड चाचणी आयोजित करुनच प्रत्येक खेळामध्ये सहभागी होणा-या वैयक्तिक व सांघिक खेळाडूंची निवड करावी.

2)       निवड झालेल्या सर्व खेळाडूंची माहिती जसे की,जन्मतारीख, इयत्ता, वय, आधारकार्ड क्रमांक, ज्या खेळामध्ये भाग घ्यावयाचा आहे त्याचे नाव इ. तयार करुन ठेवावी.

3)       कोणत्याही कारणास्तव एकदा निवड केलेला खेळाडू बदलण्याची परवानगी मिळणार नाही. त्यामुळे खेळाडूंची निवड करताना विहीत पध्दतीनेच आणि खेळाडूंना विचारुनच करण्यात यावी.

4)       सन 2022 पासुन कोणत्याही स्पर्धेमध्ये सहभागी होण्यासाठी वयाचा पुरावा म्हणून स्पर्धेला जाताना खेळाडूचे आधारकार्ड / पासपोर्ट आणि जन्मतारखेचा पुरावा असणारी बाब (उदा.शाळेचे बोनाफाईड, जन्मतारखेचा दाखल्याची सत्यप्रय अथवा शाळेच्या जनरल रजिस्टरची सत्यप्रत ) असणे आवश्यक आहे.त्यामुळे याबाबत खेळाडु व पालकांना माहिती दयावी.

5)       जिल्हा क्रीडा अधिकारी कार्यालयाकडुन शालेय क्रीडा स्पर्धा आणि कार्यालयाकडुन आयोजित करण्यात येत असलेल्या विविध उपक्रमांबाबतची माहिती आपणास ही http://raigadsports.blogspot.com/  या वर उपलब्ध असेल. त्यामुळे याबाबत वरील साईट नियमित पाहण्याबाबत खेळाडू व पालकांना माहिती दयावी. स्पर्धेसाठीची प्राथमिक प्रवेशिका, खेळ निहाय प्रवेशिका, स्पर्धेच्या भाग्यपत्रिका, स्पर्धा वेळापत्रक, ठिकाण, तारखा इ. स्पर्धेच्या अनुषंगाने सर्व माहिती ही वरील साईटवर उपलब्ध असेल, त्यामुळे सदर साईट नियमित पाहावी.

6)       प्राथमिक प्रवेशिकेची ऑनलाईन नोंद झाल्यानंतर खेळाडूंची नोंदणी (ओळखपत्र) करुन संघ / खेळाडूंचे ऑनलाईन प्रवेश अर्ज प्रत्येक स्पर्धेच्या प्रथम दिवसाच्या पाच दिवस आधी अथवा विहीत केलेल्या कालावधीमध्येच नोंद करणे आवश्यक आहे. त्यावर शाळेच्या मुख्याध्यापक अथवा महाविदयालयाच्या प्राचार्याचा सही शिक्का असणे अनिवार्य आहे. त्यांनतर सदरचा प्रवेश आपोआप बंद होईल. असा प्रकारे प्रवेश बंद झाल्यानंतर संघाची / खेळाडूची प्रवेशिका ऑनलाईन स्विकारली जाणार नाही अशा खेळाडूंना कोणत्याही सबबीवर स्पर्धेत सहभागी करुन घेण्यात येणार नाही.तसेच फक्त ऑनलाईन ओळखपत्रावरही सहभागी करुन घेतले जाणार नाही. ऑनलाईन प्रवेश अर्ज आवश्यक राहील, याची सर्व क्रीडा शिक्षकांनी नोंद घेवून सहकार्य करावे, मॅन्यूअली तयार करण्यात आलेल्या प्रवेशिका / ओळखपत्रे असलेल्या खेळाडूंना स्पर्धेत सहभागी करुन घेण्यात येणार नाही याची कृपया नोंद घ्यावी.

 

आपला – सुहास व्हनमाने, जिल्हा क्रीडा अधिकारी, रायगड

*सुब्रतो मुखर्जी कप फुटबॉल महत्वाची सूचना*

दिनांक १९-०७-२०२२

*सुब्रतो मुखर्जी कप फुटबॉल महत्वाची सूचना*

फक्त रायगड जिल्हा (पनवेल मनपा वगळून)

काही तांत्रिक व अपरिहार्य कारणास्तव रायगड जिल्हा स्पर्धा २१ जुलै २०२२ रोजी होणार नाहीत. आता स्पर्धांचा सुधारित कार्यक्रम पुढीप्रमाणे देण्यात येत आहे.

*दिनांक २५ जुलै २०२२ रोजी १७ वर्षाखालील मुले*

*दिनांक २६ जुलै २०२२ रोजी १७ वर्षाखालील मुली व १४ वर्षाखालील मुले*

ठिकाण तेच राहील कर्नाळा स्पोर्टस अकॅडमी पनवेल. संपर्क श्री समीर रेवाळे सर यांचेशी साधावा.

जिल्हास्तरीय सुब्रतो मुखजी कप फुटबॉल स्पर्धांना दि.21 जुलै रोजी सुरुवात

                 जगभरात कोरोनाचे संकट पसरल्याने जागतिक स्तरावर सर्वच क्षेत्र कोरोनामुळे प्रभावित झाले आहेत त्याचा परिणाम क्रीडा क्षेत्रावरही पडलेला दिसून आला. मागील गेल्या दोन वर्षापासुन शासकीय क्रीडा स्पर्धा झालेल्या नाहीत. विविध स्तरावरील स्पर्धा , शिबीरे, प्रशिक्षण इत्यादी कोविड कालावधीत बंद राहील्याने क्रीडा क्षेत्राची मोठी हानी झाली आहे. दरवर्षी रायगड जिल्ह्यातील हजारो खेळाडू विविध क्रीडा स्पर्धा व शिबीरांमध्ये सहभागी होत असतात, त्यांना याचा खरा फटका बसला आहे. 

                आता जग कोरोनाच्या सावटातून सावरत असून पुन्हा एकदा क्रीडा क्षेत्र उभारी घेत आहे. क्रीडा व युवक सेवा संचालनालय, महाराष्ट्र राज्य अंतर्गत जिल्हा क्रीडा परिषद, जिल्हा क्रीडा अधिकारी कार्यालय व पनवेल महानगर पालिका यांचे वतीने जिल्हास्तरीय सुब्रतो मुखर्जी कप फुटबॉल स्पर्धांचे आयोजन कर्नाळा स्पोर्टस ॲकेडेमी येथे करण्यात येत आहे. या स्पर्धांना दि.21 जुलै 2022 रोजी सुरवात होत आहे. या स्पर्धा 14 वर्षाखालील मुले, 17 वर्षाखालील मुले व मुली या दोन वयोगटामध्ये खेळविण्यात येणार आहेत.   14 वर्षाखालील मुले (सबज्युनियर) वयोगटासाठी  जन्मतारीख – दि.01 जानेवारी 2009 रोजी किंवा त्यांनतर जन्मलेला असावा तर 17 वर्षाखालील मुले व मुली (ज्युनियर) वयोगटासाठी जन्मतारीख – दि.01 जानेवारी 2006 रोजी किंवा त्यांनतर जन्मलेला असणे बंधनकारक आहे. रायगड जिल्ह्यातील ज्या शाळा / कनिष्ठ महाविद्यालयाच्या संघांना या क्रीडा स्पर्धांमध्ये सहभाग घ्याचा आहे त्यांनी विहीत नमुन्यातील आपले प्रवेश अर्ज (रायगड जिल्हा करीता) raigadgames@gmail.com या ईमेलवर तर (पनवेल मनपा क्षेत्र) pmc.sports.cultural@gmail.com  या ईमेलवर सादर करण्यात यावे. स्पर्धेसाठी पुढील प्रमाणे आवश्यक कागदपत्रे सादर करणे आवश्यक आहे 1)  विहीत नमुन्यातील प्रवेश अर्ज प्राचार्य/मुख्याध्यापक यांच्या स्वाक्षरी  व शिक्यासह  2)  संघातील सर्व खेळाडूंच्या जन्मदाखल्याची छायाप्रत, आधारकार्डची छायाप्रत  व बोनाफाईड प्रमाणपत्र.  सर्व संघांना प्रवेश अर्ज सादर करण्याचा अंतिम दिनांक 19-07-2022 असा राहील. त्यानंतर सादर होणा-या प्रवेशिकांचा विचार केला जाणार नाही याची नोंद घ्यावी.
                रायगड जिल्हा फुटबॉल असोसिएशन यांचे तांत्रिक सहकार्य या स्पर्धांसाठी घेण्यात येत आहे.  या स्पर्धांच्या अधिक माहितीसाठी (रायगड जिल्हा संपर्क) श्री. सचिन निकम, क्रीडा अधिकारी मो.क्र.8856093608, श्री. समीर रेवाळे, कर्नाळा स्पार्टस ॲके. मो.क्र.9766235250 तर (पनवेल मनपा क्षेत्र संपर्क)  श्री.नामदेव पिचड, पनवेल मनपा, क्रीडा प्रमुख, मो.क्र.7977212962,श्रीम. मनीषा मानकर, क्रीडा मार्गदर्शक मो.क्र.9767499162,श्री. समीर रेवाळे, कर्नाळा स्पार्टस ॲके. मो.क्र.9766235250  संपर्क साधावा असे आवाहन जिल्हा क्रीडा अधिकारी श्री रविंद्र नाईक यांनी केले आहे.